تقيل وخفيف

 

قزحيا ساسين

مصاري

المصاري الخفيفِه بتتقل إزا تديّنتا.

محزون

ما حدا قدّ المحزون بيعرف قدّيش الكحل تقيل عالعين.

بالرقبِه

ما في أتقل من الدمّ… بالرّقبِه.

ميّ وقطن

تا ما يكون حملك خفيف، ما حدا بيحمّلَك الميّ لَ وحدا، والقطن لَ وحدو.

جوزِه

الجوزِه الخفيفِه ما إلا عيد بين الكفّ والرِّكبِه.

سيف

السيف التقيل قتل صاحبو.

كَنايِس

يا ما كنايِس فاضيِه، من الجرس التقيل لْ ما في حدا يدِقّو.

فرح؟

ما في أتقل من الفرح اللّي مش عارِف إزا كان لازم تضحك فيه أو تبكي.

سمكِه

السمكِه بتتقِّل حالا، بالميّ… مش بالشّبكِه.

حجر

الحجر خفيف، عا كتف الحجر.

حطب

حِمْل الحطب التقيل بالصيف، ما في أخفّ منّو بالشتي.

تاج

تاج الملك بالصندوق الخفيف.

عنقود

تقل العنقود بالكاس مش بالعريشِه.

ملح وسكّر

حبّة الملح الزغيرِه تقيلِه عا ضهر النملِه، مش حبّة السكّر الكبيرِه.

مقلعجي

اشتغل المقلعجي بيّاع ورد، شاف الوردِه أتقل من الصخرَه.

حبِّة قمح

لوما خفِّت حبِّة القمح وصارِت حبّتَين طحين، ما وصلِت لَ عند الخبّاز.

شعر وحكمِه

الحكي بالشعر أخفّ من الحكي بالحكمِه. كلّ ما خفّ الحَكي بيرقِّص القلب، وكل ما تِقِل بيرقِّص العقل.

جَرَّه

الجرَّه المليانِه عَطَش، أتقل من الجرّه المليانِه ميّ.

محبَس

ما في أخفّ من المحبَس عالإصبَع، وما في أتقل منّو عالرقبِه.

إبرِه

الإبرِه التقيلِه هيّه الإبرِه اللّي بعدا بلا خيط.

مرض

ما تقَّل الغصن إلاّ التمرَه المريضَه.

كبّوت

ياما البرد بينحَمَل أكتر من الكبّوت التّقيل.

حْمال

كلّ الحمال بـ أوَّل الدرب خفيفِه.

رَسَن

الرّسَن التقيل بيعرِّق الحمار وصاحبو.

طيّارة ورَق

طيّارة الورق تقيلِه عالهوا الموجوع.

باب حديد

باب الحديد بيدِقّ قلبو، إزا دقِّتو النار الخفيفِه.

عا دَوري

حبيبي عبّا الوديان حكي، وعا دوري تِقِل لسانو.

توابيت

بيّاع التوابيت ما بيخِفّ التابوت قدّامو، تا ينتلي.

سلِّه

يللي بيتقِّل سلّتو بيِحمِلا فاضيِه.

بيت

تطلَّع المعمرجي بالبيت اللّي عمّرو، وقال لَ إبنو: ما في أخفّ من هالبيت، أنا حمِلتو… حجَر حَجَر.

تلج

التلج الخفيف لمّا بتطلع الشمس بيتقَل.

غصن

تطلّع الغصن بالأرض وقال: “قدّيشو خيالي خفيف، عم بيهزّو الهوا”.

لحيِه

لا ترَبّي لحيِه، ولا تتقّلا بـ حجر، تا ما يلعب فيا الهوا.

بصلِه

مش تقل البصلِه اللي شدّ الدمعَه نزول.

ريشِه

إزا تَرَك الرّسّام ريشتو الخفيفِه ترسم عا زوقا، ما بترسم إلاّ صخور.

حمامِه حمرا

ما في أتقل من الحرب إلاّ السلام اللّي حمامتو حمرا.

فيل

ما في أخفّ من الفيل… عا ضهر بيّو.

بصّارَه

ما عرقِت البصّارَه من تقل الفنجان، عِرقِت من اللّي شافتو بـ قلبو.

غربِه

الغربِه أتقل من الخطيِّه عا جناح الملاك.