مَيِّت وعايِش

 plant with bokeh

قزحيا ساسين

آخر نِتفِه

كلّ يوم بيموت منّا نتفه، بسّ ما بيدقّ الجرس إلاّ لمّا بتموت آخر نتفه.

في وقت

بَعد ما لاقي الحيات (أي “الحياة” بالعامية) اللي قبل الموت، ببقا بفتّش عالحيات اللي بَعدو.

قصايد

إزا عِشِت أكتر من قصايدي… بموت.

قِلِّه

متل ما في ناس عاشت من قلّة الموت، في ناس ماتت من قلّة الحيات.

السبب

ما في سبب للموت… غير الحيات.

شفيعنا

اللي بيشفَع بـ هالحيات إنّو في موت. إزا ما عجبتنا الحيات التانيِه شو منعمل؟

الأهرام

أنا بقلّكُن مين عمَّر الأهرام: الموت.

مقبرَه بالإيد

حامل بـ إيدي مقبرَه. كلّ يوم بكّير، بفَضّي ساعتي من الوقت الميِّت.

عمر

الإيّام الميّتِه اللي بتمرق بـ عمرنا، أكتر بـ كتير من الإيّام العايشِه.

 

الزهر قليل

لأنّو كلّ الناس بعد ما يموتو بيصيرو تراب، مش كلّ التراب بيطِّلّع زهر.

بيّاع

بيّاع الكفن بيموت، بسّ مش من الجوع.

طباعَه

كل ما إطبع ديوان شعر جديد، بحسّ حالي فاتح فرن مناقيش… بين القبور.

شو زنبو؟

إزا ما كنت قادر عالموت، لا تتمرجل عا بيّاع التوابيت!

عتيق

قدّ ما يكون الساعاتي عتيق ما بيقدر يأخّر ساعتو.

بالي

بالي مقبره عملاقه. مين بيريّحني من تراب الناس اللي ماتو بـ بالي؟!

أوّل مرَّه

عا طول في أوّل مرّه. الموت هُوّه وعم يمرق بـ أوّل إنسان، كان عم يرجف أكتر منّو.

وجاع

عا قدّ ما حامل وجاع، ما حدا بيقبل موت عنّو ويعيش عنّي.

بيوت

القبور بيوت ميّتِه.

قبل ما يخلَقو

ما لقِيت مرا تا شيل ولادي منّي. بْكِيت ع ولادي اللي ماتو قبل ما يخلقو.

تمسال

ما في إنسان بيعيش بـ تمسالو بعد ما يموت. التمسال جتِّه تانيِه.

قياس

إزا بدنا نقيس أطوَل عمر إنسان بالحكي، بيِطْلع تْلَتْ جُمَل: ألله يعيّشو، وانشالله بيتهنّا، والدفن الساعَه تلاتِه.

شو رأيكن؟

تا نتعوّد عا فكرة الموت، لازم نسمّي التخت: تابوت بلا غطا.

بُخار وبخّور

بـ شرفكن، لَو الإنسان بدال ما يموت بيتبخَّر، ما كان البخار مكسور سمّو أكتر من البخّور؟

ما بقا مَعُن

لَو الموتا بعد معن شي يعطوه، العايشين ما بيتكحّشو عن بواب المقابر.

بُخل

في ناس ما بيبكو عليك إزا ما ضيّفتُن بـ مَوتك دموع.

بـ تابوت واحد

دقيقَه وحدِه ما بيعيش الجمال بعد موت البشاعَه.

عايشين

في ناس بقيو عايشين بعد الموت، لأنّو الحيات ما بتطْلَع عَنُن.

شاطر

بيّاع التوابيت بيجوّز إبنو وما بيضحك، لأنّو ضحكتو تقيلِه عا أهل الميّت.

وحْدو

الموت بيردّ الروح.

دمعَه

الدمعه اللي بتطلع من العين بتموت، بسّ بتصير أغلا.

منجل

بكي المنجل بعد ما ماتت السنبلِه، لأنّو ما قدِر يجرحا أكتر.

جروح

ما في حدا بتشفا جروحو. في حدا حامل جروح عايشِه، وحدا حامل جروح ميّته.

قاموس

أكبر مقبرَه خيريِّه… القاموس.

تجميل

أوّل جرّاح تجميل… الموت.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s