قزحيا ساسين

إحتفال الحركة الثقافيّة-إنطلياس

بصدور ديوان… “غربال العسل”

المنتدون
المنتدون

بدعوة من الحركة الثقافيّة-إنطلياس غصّ مسرح الأخوين رحباني بالمدعوّين إلى الاحتفال بصدور ديوان “غربال العسل” للشاعر قزحيا ساسين.

قزحيا ساسين يقرأ من الديوان
قزحيا ساسين يقرأ من الديوان

قدّمت الاحتفال الإعلاميّة جويل فضّول، التي القت كلمة بالمحكية، جاء فيها:

الحكي بالحركه السقافيّه بـ أنطلياس حِلو، لأنّو من هون بْيِطْلع عطر الحرّيّه وعطر السما وعطر لبنان. والحكي عن الشاعر قزحيا ساسين حلو كَمان، لأنّو ما بيقطف إلاّ من غصون الحلا العاليِه، وبالكاد عَينو تقشع من وين عم تقطف إيدو.

“غربال العسل” يا قزحيا؟! إيه، وغربالك عيونو ضيّقين، وعسلاتو مقطوفين قبل ما إمُّن تبوس تمُّن. واللي بيدوق كلمتَك بتورّطو. لأنّو عسل الشعر المزغول عنّا مكوَّم عالمنابر ووراق الجرايد، وما بعرف كم بدنا نحطّ شاعر فوق شاعر تا يصيرو بـ طول قامتك الشعريّه لْ أطْوَل من بال ستَّك الصايمِه عالجوع، وأطْول من بال النبيد عالوقت. وما بعرف قدّيش بدنا ننطر تا نشوف غربال بـ وسْع غربالك وإيدين بـ وسْع إيديك.

تا ما طوِّل الحكي ومدّ إيدي عا وقت غيري،  رح قول ولَو كانت شهادتي مجروحَه: غربال العسل أكتر بـ كتير من ديوان شعر، ولمّا بدّو يتوحّم الحلا عا إنجيل رح يسمّي غربالك يا قزحيا إنجيل الشعر اللبناني.

العسل بيِتْغَربَل

جويل قضّول تصغي لكلمة إلي صليبي
جويل قضّول تصغي لكلمة إيلي صليبي

وتحدّث عن الديوان الأديب والإعلاميّ إيلي صليبي، فقال:

حطّ كتابو ع طاولتي… وفلّ. فلْفَشت. وقلت شو هالمجنون… العسل بيتغربل؟ بعد كم صفحَه دقت العسل وحلي قلبي. وصرت مجبور إقرا نقطَه نقطه. وإتنقّل من نحلِه لنحله… ومن قفير لقفير. تاري العسل بيتغربل!

قزحيا ساسين، شعرك ما بيقرب الزجل وما إلو علاقَه بالدفّ. بيتنصنّف شعر وبسّ. ما فيه رصف ولا وصف… فيه ومض البرق وهدير الرعد… وبيشتّي صَحُو.

قزحيا ساسين، بتعرف شو؟ غربالك صفّا العسل 59 قصيده، كلُّن سوا ما بيطلعو ميتَين بيت

بسّ كلّ بيت قصيده، كلّ عنوان قصيده بديوانك قصيدِه.

اسمعو: “افتحلي يا حالي… جيت”، “كتار وحدَك”، “ضاع الغفا بالعتم”، “توابيت من ورق”، “روزنامَه بلا قلب، “رجِع الموج عالمَيّ”، “مدرسة عصافير”، “نبيد شارب عرق…”!

والله حرام عليك، خَلّي شي الواحد ينتقدك فيه، ولَنّو شي بيت أعرج، أو وزن مكسور، أو معنى بلا معنى، أو كترة حكي وثرثرَه متل كتار من اللي بينشفق عْلَيُن لأنّن بينتحلو صفة شعّار… والله حرام عليك ، خلّي شعر غيرك يتنفَّس عالورق، كنت تْركلك شي زاروب للتهريب… وبعرف أكتر من حدا قدّ ما عقّدو شعرك شمَط منّو وما استحى.

قزحيا ساسين.. شعرك، إنت. وإنت شعرك. لا بتنحت… لا بترسم… ولا بتزوزق

وبتطلع منّك القصيده كلّ كلمه تمثال ولوحَه ومرا حلوِه.

“بلا جميلة الإزميل”

وأضاف صليبي: عمول معروف يا صديقي فتاح الكتاب عــ الصفحة 107 وقْرالنا “بلا جميلة الإزميل”، غصبن عنَّك قْرا:

“ارتاح يا نحّات… بيقَدّي/حاجِه تْفَلّي صخر… بيقَدّي/جدّي اللي بَعدا مَرقتو بالبال/خيّال بيعَبّي السّما بـِ سلال/والجُرْد عالي… والشمس حَدِّه/ما عاد بدّي إحبسو بـ تمسال/من كلّ قلبي… ما بَقا بدّي/…/تْطِلَّعت متلَك… شفْت صخر جبال/كلّ الصّخور بْيِشْبَهو جدّي”.

قزحيا ساسين،شعرك مقلع حجارو مش من هالأرض. بتعمِّرُن بيوت زغار كأنّك ما بدّك حدا يسكن فين، بدّك هنّي يسكنو فيك. بيوت بتفتفت القلب من الوجع. ومش أيّا وجع. أنا بسمّيه وجع الجمال. وجع الكلمه. وجع النغم بضلوع القصب.

كمان عمول معروف، الصفحه 121:

“سَرِّب… شو بعد منَطّرَك عالبير؟!/قَلّي الوَجَع:”ما فِي حدا عندَك”/سَكِّر القلب ونام عا بكّير/لا تعِدّ… كلّ لْ قاشِعُن حَدَّك/هَودِه إنِتْ وحْدَك/إنته لْ كتِر ما وْجِعْت صرت كتير”.

قزحيا ساسين، شعرك غرابة العصفور الــ بيغط عـ كوز التين، مش تـ ينقرو، تـ يترك عليه نقطة عسل. دهشة الدمعة بكاس الـ عرق اللي  قبل ما تنشرب بتدوق شَفّه وبتسكر بحالا.

وكمان عمول معروف: الصفحة 62:

“عِنّا العنب رجّال… والكَركِه مَرَا/لْ عندا بيُمْرُق من بواب المعصَرَه/و الأرض بركة دمّ مطرح ما مَرَق/وبيفُوت… وبْيقعُد فيا… وبْيغمرَا/هُوَّه وفيا… كيف شكْل قادر يغْمرا/غمرَه طويلِه كتير… تا يكِدَّا العَرَق؟!”.

وختم صليبي: شعرك… يا قزحيا صلا.. شعرك بشتهيه، ضارب عيني عليه… خود غربالك قبل ما إسرق منّو العسل. ولو بعد في وقت كنت بحمل الغربال عـ صينيِّه وبضيِّف الموجودين.

وبعده شاركت أمال فخري والشاعر طوني خزامي، إضافة إلى الطفلين إيلي وآنجي قزحيا ساسين في إلقاء باقة من قصائد “الغربال” الرائعة.

قزحيا ساسين موقعا "غربال العسل"
قزحيا ساسين موقعا “غربال العسل”
Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s