زحفِه ووقْفِه

 koz

قزحيا ساسين

 

قلم

القلم عندو من نفْسو، ما بيكتُب إلاّ عالواقف.

مَيّ

نقطة ميّ: يا عيني شو طيّبِه الوقفه!

نقطَه تانيه: ليش، الميّ بتوقَف؟!

أوّل نقطَه: يمكن يا إختي بعد ما مرقتي متلي… بـ شلاّل.

جبين

لا تصدِّق عينيك، الوقفِه ما بدّا إجرين… بدّا جبين.

حيِّه

إزا شفت الحيِّه واقفِه، لا تمدّ إيدك تا تسلِّم.

أقرع

الأقرع، شو بدّو يوقّفلو شعر راسو؟!

مين متْلا؟

الشجرَه اللي عا راس الجبل، مش زاحفِه وَلا فشخَه طلوع.

شهيد

وقِّف الأرض شوَيّ، بتشوف زحفة اللي حامل النار عا ضهرو أوَّل وقفة عزّ.

فتِّح عينيكْ

تا تعرفني إزا كنت واقف، شوف إزا كان جبيني تحت إجريِّي… أو فَوقُن.

بَلا إجرَين

يللي واقفين وما مَعُن إجرَين، عم يوجَعُن قلبُن عا يللي بيزْحَفو وجارِّين إجْرَيُن وراهُن.

سمكِه

السمكِه ما داقت الوقفِه إلاّ لمّا علْقِت بالصنّارَه.

قيامِه

ما بعرف يا ربّ إزا كنت إنته اللي قمتني من الموت. بزكُر لمّا مَرَقتْ حدّ مقبرتي… وقفتلَّك.

سطر

السطر الواقف بيضلّ فاضي.

عريشِه

العريشِه ما إلا هيبِه ولَو كانت أعلا من الشجرَه، لأنّا طلْعِت… زحْف.

أوطا

ما حدا أَوْطا من اللي عم يزحف إلاّ اللي واقف عا إجرَين غَيرو.

غريب!

السنبلِه الواقفِه، بتطْلَع من التراب اللي عم يزحف بالسهل.

بَيت

البَيت زحَّف البزّاقَه.

حجر وحبر

انقهر الحجر لأنّو تماسيل الحبر بتعيش واقفِه أكتر من تماسيلو.

دَينِه

الدَّينِه بتشوف الزحفِه قبل العَين، لأنّو الصوت بيزحف بالأوّل.

طَير

الطَّير المجروح اللي زحف عالتراب، جوانحو وَجَّعوه أكتر من جروحو.

حطّاب

الحطّاب المغرور، افتكَر الشجر بالغابه… واقفلو.

شمعَه

ضوّ الشمعَه… من وَقْفِتا.

خَيط وإبرِه

الخيط اللي معلَّق بالإبرِه، بدّو يزحف متلا.

بخّور

البخّور أوّل تراب زحف علَيه الإنسان.

شكّ

قبل ما تزقِّف للواقف، قَشِّرْلو وَقِفْتو تا تشوف إزا في تحتا زحفِه.

مش قابِل

مش مستعدّ سَمّي الزحف بالميّ… سباحَه.

مشط ومقصّ

المشط ما بيمُون عالشعر الواقف، إلاّ إزا كان المقصّ وَراه.

سنبلِه

السنبلِه الواقفِه، بتاكل منا النار، بَسّ بتطَعْمي… خبز.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s