قشّ وكبريت

k-2
قزحيا ساسين

كبْر راس

الكبريت كبَّر راس القشِّه، وما عرْفِت لمّا بتحرق… بتحترق.

شو عرَّفو؟

لَو ما كان الكبريت قشّ، شوعرّفو إنّو القشّ بيولَع؟

ما في قبضايات

من يوم ما حبَّيتِك، صار النهار كبريت، والليل قشّ. والقبضاي يردّ النهار عن الليل.

قهر

ما بيقهر قلب قشّة الكبريت إلاّ القشِّه اللي بتعمِّر بيتا بالميّ.

حياة وموت

الحياة سلُّم قشّ، والموت قشّة كبريت ناطرَه بـ كعب السلُّم.

إزا بدّا

قشّة الكبريت اللي بدّا تعيش… بتقصّ راسا.

قوم من التخت

شو بينفعك إزا كنت نايم بـ تخت من قشّ الكبريت، وعم تبصر الدنيِه عم تشتّي؟!

نصّ الغابِه

إلَك نصّ غابتي، إزا بتعطيني قشّة الكبريت اللي بـ إيدَك.

ما بتقدر

علبة الكبريت الزغيرِه بتحرق الغابِه الكبيرِه، بسّ ما بتقدر تساع رمادا.

غرقان

الغرقان بـ بحر قشّ، بيتعلَّق بـ قشّة كبريت.

بيوت

حَسَدت اللي بيوتُن من قشّ، لأنُّن بيعيشو أكتر من بيوتُن.

برّاتا

القشّ بيدفّي بَرّات النار، مش جوّاتا.

حديد

يا ما الحديد نازِل منّو قشّ… بالنار.

دبكِه

الجمر بيِمْسك عالدبكِه بـ غربال القشّ.

 

أوّل صدريِّه

العصفور خيَّط بالقشّ أوّل صدريّه لَ حَوَّا.

عصفورَه

الصيّاد بيخَلّي العصفورَه تُوصَل قبل القشّه عالأرض، بسّ بتضلاّ عصفورَه.

برنَيطَه

إزا كنت حابب ترقص بالنار، عالقليلِه شيل عن راسك برنيطة القشّ.

بالميّ

القشّ بيشوف حالو عالحديد، بالميّ… مش بالموقدِه.

عمِّر

القشّ اللي ما بتعمّرو عشّ، بيطَيّرو الهوَا.

سنابل

يللي مزَعَل السنابل إنّو بسّ ينشال القمح منا، منصير نسَمِّيا… قشّ.

وَسْعَه

يللي بدّو يتاجر بالقشّ، بدّو يكون عندو وَسْعَه.

عمر قصير

قدّ ما نار القشّ قويِّه بتحرقلو… عمرو.

ضرس وعين

القشّه اللي بتضحِّك الضرس بتبكّي العَين.

منجل

ما صار المنجل حديد، لَو ما القشّ كبَّر راس مع منجل الخشب.

ملْح

القشّ ملح النار.

حِمْل

حِمْل الحطّاب عا قدّو. إِجِت قشّه علَيه، نَزَّلو عالأرض… تا شالا.

كوخ

الشمعَه بتضوّي كوخ القشّ… مرَّه وِحْدِه.

غَرَق

القشّه ما بتغرَق، لأنّو الغَرَق ما بيدنّي نفسو عْلَيَا.

درَج

ما طِلْعِت النار قبلَك عا درج القشّ… تا تضَوّيلَك.

بتنطُر

النار اللي إلا قشّه تحت التلج، ما بتنطفي تا تاخدا.

القشّ بدّو قشّ

لا تتْعَبو… ما بتوصَل العين عْلَيَا

بالقشّ لَولا نزْلِت فتافيت

إبرِه بـ كومة قشّ… ما بيلاقيا

غَر قشّة الكبريت.

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s