نبيد وخلّ

koz-2
قزحيا ساسين

يطوِّل عمرو

مرَق الوقت، ما ضلّ شي ما ضرَبو بـ حجر. وحْدو النبيد، دِعيلو بـ طولة العمر.

خاطي

الخلّ نبيد خاطي.

دمعَه

دمعة الكزّاب خلّ الميّ.

ما بتصير

صارت الميّ نبيد، بسّ الخلّ… ولا مرَّه.

مرايِه

تمَرّا الخلّ عالنبيد وقلّو: “خود وجّي واعطيني المرايه”.

قصّة كاسات

الخلّ بينشرب، بسّ مش بـ كاسات كبيرِه.

قدّيس

العنقود القدّيس، بيرشح نبيد هوِّه وبالعريشِه.

عالسما

الخلّ كمان بيطلِّع عالسما، بسّ إزا انشرب مش إزا انباع.

دوا

الخلّ مش دوا، بسّ إزا بيشربو المرَض بيموت.

تحضير

النبيد بيقعد بالعناقيد الواطيِه، تا يتحضّر للعيشِه بالقبو.

ميّ

النبيد ميّ مدَودخَه.

أطْيَب

الخلّ اطيب من النبيد اللي بيسكَر بـ حالو.

ما بيعرفو

سأَلو الخلّ عن نبيد الزلّ:” هيدا إبنَك؟”. قلُّن:” لا إبني ولا بعرفو”.

ألله يكبّرو

كلّ جرّة نبيد طفل عا إيد عريشِه.

ابن وبيّو

العنقود بَيّ، والنبيد إبنو. والولد اللي حاملو بيّو ع كتافو بيشوف إشيا مش شايفا بيّو.

لَ ورا

ما في نبيد بيرجع عالعنقود. النبيد اللي بيتطلَّع لَ ورا بيصير خلّ.

عريشِه

العريشه لْ ما بتشرب خلّ، ما بينعصرو عناقيدا نبيد.

ما بقا يتهدّا

وصل الخلّ عالصحن، صار بدّو ينسكب بالكاس.

 

 

حَقّو

متل ما المسيح كان مشتاق يرجع لَ عند بيّو، حقّو النبيد بـ عرس قانا يشتاق يرجع ميّ.

فوق

مين بيفتح خوابي النبيد فوق، إزا بقيِت ريحة الخلّ بتقتل عا درج السما؟!

طلْعِت ريحتو

مشي النبيد مع الخلّ ، ما عاد حدا يعرفو قدّ ما ريحة الخلّ قويِّه.

قمر سكران

القمر اللي بدّو يتمرّا ع بحَيرة نبيد، بدّو يرجع عالسما سكران.

ملَك

الملك اللي اشترا كلّ نبيد المملكه تا يسكر لَ وحدو، شِرِب الخلّ بالتاج.

شي ومنّو

قدّ ما يكون الخلّ راضي عالنبيد، مش رح بيعزم علَيه بالسهرَه.

معتَّق

ما تسأل شو حقّ خابية النبيد؟، بدَّك مصاري سمْك الغبرَه اللي عْلَيا.

ما بتزبط

صحيح إنّو النبيد إبن النطرَه بالخوابي، بسّ اللي بياكل عنب بـ هالصيف ما بيسكر بالصيف التاني.

عالسَّكت

السكوت اللي بالنبيد وبالفخّار وبالخمّار، جايِه من مطرح واحد.

 

خاتم

حطّ الخلّ بـ إصبعو خاتم نبيد، تا ما حدا يدعيلو عا إيدو بالكسر.

حداد

لمّا بتنكسر خابية النبيد، بتصير عتمة القبو حداد.

غَنّو

غنّو للخلّ، النبيد عندو كتار يغنّولو.

ضيعانا

الخلّ ما بيتروَّب نبيد. ضيعان الرّوبِه.

دعسِه ناقصَه

الخلّ نبيد دعَس دعسِه ناقصَه، وما قِدِر كمَّلا.

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s