فجّ ومستوي

Koz
قزحيا ساسين

بطّيخَه

قدّ ما تكون البطّيخه مستويّه ما فيا تهرب من السكّين الفجّ.

صعبِه

الإيد الفجِّه ما بتقطف تمْرَه مستويّه.

تمسال

ما في تمسال فجّ بـ صخرَه مستويّه.

مرا

المرا هيِّه التمْرَه الوحيدِه اللي فيا تكون مستويِّه… وترجع فجِّه.

علْقَه

شو بيعمل اللي مرْتو عم تتوحّم عا حصرم مستوي؟!

راس جدّي

كل ما طلعت الشمس عا راس جدّي، كل ما صار فجّ أكتر.

خَتْم

منقار العصفور ختْم عا كوز التين المستوي.

رُوق

علِّق الروزنامَه عالشجره، قبْل ما تقطف التمرَه المستويّه من برَّا.

صبَّير

الصبَّير بيصير شَوكو فجّ أكتر لمّا تمرتو بتصير مستويّه.

نصّ قطفِه

التمرَه اللي نصّا فجّ نصّا مستوي، ما بتنقطف نصّ قطفِه.

عم تتكبّر

التمره المستويّه اللي بتتكبَّر عالطَّير، بينقرا بـ عقصتا تا يضيّفا للتراب.

غبيِّه

ما في أغبا من التمره اللي بقيت عالغصن فجّه ، وموعودِه تضلّ للموسم التاني.

لَ شو؟

لَ شو التمره المستويّه إزا كان راسا فجّ؟!

عاليِه

التمره العالْيِه عالإيد، بتضلّ بالعَين فجَّه.

لَبْوِه

حليب اللبوه فجّ، قدّ ما تكون هيّه وعم ترضّع شبلا مستويّه.

مرَّه

ما في تمره بتستوي مرّتَين.

حَيَا

التمره اللي عندا حيا، ما إلا عين تستوي هُوَّه وعم يتطلَّع الفلاّح فيا.

ضوّ

الفجر، بْيِطْلع الضوّ فجّ، كمان بدّو شمس تا يستوي.

بخيل

القرش اللي بتاخدو من البخيل، بتحسّو فجّ وما فيك تصرفو قبل ما يستوي.

قطاف الليل

التمره اللي بتقطفا بالليل مستويّه، فيا لمّا بيطلع الضوّ ترجع فجّه.

حبّة زيتون

حبّة الزيتون الفجّه ما بتضوّي السراج.

جَوزه

كل ما تستوي الجوزِه كل ما يصير بدّا حجر أكبر.

كلمِه

الكلمه الفجّه بالقصيدِه بتنقّص من طعمة الكلمه المستويّه.

ملْح

الملح تمرة الموجه المستويّه.

ما إلا حلِّه

شو بتعمل التمره إزا كان هيّه ومستويّه ما بتجيب سعر، وهيّه وفجّه ما حدا بيشتريا؟

نيّالو

نيّالو اللي ما بيستوي عا تمرَه فجّه.

شي طيِّب

بين الفجّ والمستوي، في شي طيّب متل النعَس بين الوعيِه والنَّومِه.

يا ريت

التمره الفجّه ما بتتعلَّق بالغصن بعد ما تنقطف.

بتفْهَم

التمره المستويّه بتعيِّد بالغصن الواطي، تا تقطفا الإيد قبل التراب.

خسارَه

يللي أكَل التمره الفجّه اليوم، وترك المستويّه لَ بكرَه، خسِر تمرتَين مستويّين.

مرحبا

التمره اللي ما بتردّ المرحبا هيّه وفجّه، ما حدا بيصبّحا بالخير هيّه ومستويّه.

تلج

التلج تمرَه بتستوي بـ كانون.

من برّا

التمره الفجّه من برّا ومستويّه من جُوّا، ما حدا بيقطفا.

حامضَه

الحامضه الفجّه بتنزّل الريق… بسّ ما بتبِلّو.

سنديانِه

إزا كان ورق السنديانه فجّ، من وين بدّك تقطف منا تمَر مستوي؟!

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s