صوت وصدا

 koz

قزحيا ساسين

ببَّغا

الصدا أوّل ببّغا.

حلم

حلْم الصوت إنّو يسمع الصدا.

عمْر

الصدا عمر تاني للصوت.

وقعَه

الصوت اللي ما بيسترجي يوقَع بالوادي، ما بْيِطْلَع منا صدا.

نحنا وهُوِّه

نحنا منشوف الصدا تياب الصوت، وهوِّه بيشوفو عُرْيو التاني.

تلاتِه

الصوت أوّل عصفور، والصدا أوّل عشّ، والموت أوّل صيّاد.

بلا جْميلتو

الصوت اللي قادر يوصَل، ما بيربح جميلة الصدا.

وادي

الوادي بْيِزْعَل، لأنّو حنجرَه بتعيد الصوت، وما بتقدر تعملو.

موجوع

الصوت الموجوع بينردّ عا صابيعو باب الصدا.

إلي

صَوتي إلي، والصدا للناس.

بَريد

من زمان، كانو الناس يوَدّو صْواتُن بـ بريد الصدا.

بيعيش أكتر

الصوت اللي بدّو يعيش أكتر، بيقعد بالحبر تا ينسَمَعلو صدا بالعَين.

حمار

لمّا بيشهنق الحمار، بيكون الصدا دَنَب الصوت.

خيال

الصدا خيال الصوت، وهوِّه الوحيد اللي بيبيِّن بالعتمِه.

برْق ورَعد

البرق إلو تار عالصدا، لأنّو الرعد بينسمع مرّتَين، وهوّه بينشاف مرَّه وِحْدِه.

مليح اللي ما بيسمع

شو كان بيهدّي الصوت لَو كان بْيِسمع الصدا؟

رِزقَه

الصدا ما بيسترزق بـ ضيعة الخرسان.

غِيرِه

صارو السنان يلَعِوسو عالعالي، وما طلِعلُن صدا متل الصوت.

ريحَه بشعَه

الصوت بدّو يطلع من التمّ تا يطلعلو صدا، مش من غير مطرح.

كلمِه

الكلمِه اللي ما قدِرْت تمحيا قبل ما تطلع بالصوت، لا تحمل محّايتَك وتلحقا بالصدا.

مرَّه

ما في صدا بيعيد الصوت مرّتَين.

تنقايِه

نَقّي آخر كلمِه عا مهلَك، لأنّو الصدا ما بيعيد غَيرا.

وحْدِه بـ وحده

يللي قِبِل معك إنّو الفراشِه إلا صوت، بدّك تقبل معو إنّو صوتا إلو صدا.

ما بتزبط

فيك تسدّ دينَيك تا ما تسمع الصوت، بسّ ما فيك تقول الصدا بينسمع بالأوّل.

غلا

الصدا ما بيغَلّي الصوت، بيغلّي حالو فِيه.

بكْرَهو

أنا بكرَهْ الصدا، لأني ما بحبّ قول الكلمه مرّتَين.

أعرج

إزا كان الصوت أعرج، كيف بدّو الصدا ينطّ بالحَبلِه؟!

إحصنِه

الصوت اللي ما بيطلع منّو إحصنه، كيف بدّو يجرّ عرَبيّة الصدا؟!

نيّالو

نهر الوادي ما إلو صدا، لأنّو صوتو ما بْيِخْلَص.

مش معزوم

يللي بيحكي وَشْوَشِه، شو بدّو يرَقّصو بـ عرْس الصدا؟!

ما معو

الصدا ما معو وقت ينجِّر توابيت للصوات الميّتِه.

نملِه

صوت النملِه اللي ما منسمعو، إلو بـ دَينة الصيف صدا.

عالي

ما مهمّ الصوت يكون عالي تا يكون إلو صدا، المهمّ صاحبو ما يكون واطي.

جرْح

لْ بدّو الصدا يجرَح، بدّو يسنّ الصوت.

هيِّه زاتا

السمكِه اللي عم تسبح بـ بركة الصوت، هيِّه زاتا اللي بتطلع بـ صنّارة الصدا.

تربايِه

بدَّك تربّي صوت تا تقطف صدا.

ندم

يللي حِكي بالأوّل نِدِم، لمّا عِرِف إنّو الصدا بيعيد آخر صوت.

عم يتمرّا

الصوت اللي بيضلّ عم يتمرّا عا صِداه، بيوطا من دَينتي.

يا عيب الشوم

ما احتَقَرْت الصدا، إلاّ لمّا عْرِفتو بيعيد اصوات الكلّ.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s