ساحَه وبِركِه

koz
قزحيا ساسين

قمر

ما في غير القمر، هُوِّه وعم يمشي بالساحه بيكون عم يتمرّا عا مَيّة بِركتا.

ko

سمَك

سمكات الساحَه أحلا من سمكات البِركِه، لأنُّن ما بيبقو فيا عا طول.

ملْح

وسْع الساحه ملح البركه، لأنّو السمك ما بيقدر يطلَع برّاتا.

آخد عا خاطرو

بـ بركة الساحه ما فِي حُوت، بسّ السمك آخد عا خاطرو.

دمعتَين

الساحه والبركه دمعتين مدوّرِين: وحْده بـ ميّ، ووحده ناشفِه.

وجَع

مش عم يوجع الساحه إلاّ الشقفِه اللي مخبّايه منا تحت البركه.

شي ومنّو

بِركه بتحلّي الساحه، تْنَين… بتصير الساحه سمكه فِيُن.

قونِه وصخرَه

نحنا منشوف البركه قونه عا صدر الساحه، هيِّه بتشوفا صخرة مَيّ.

ما بْيِمشو

البركه ساعة ميّ بـ إيد الساحه، وتنَيناتُن ما بيمشو.

آب وكانون

البركه بتشوف حالا عالساحه بـ آب مش بـ كانون.

صعبِه

مش قادرَه البركه تكون متل الساحه: تفضا وتضَلاّ حلوِه.

فُقَرا

فُقَرا المدينِه، بينامو بشر عم يبكو، وبيُوعو بِرَك بـ ساحاتا.

عما

العما، إنّو يكون وجَّك ساحه، وينشّفو البركتين اللي فيا.

عزا

تعَزّا الأعور لمّا شاف الساحه اللي إلا بِركه، لأنّا متلو بتبكي بـ عين وحدِه.

هيِّه زاتا

الساحه ساحه، بـ بِركه وبلا بركه.

محبِّه

الساحَه:” بحلم أُوقَف، تا إتمرّا عليكي”.

البركه:” تا أُوقَع، مش تا تتمرّي”.

ما بتزبط

لا الساحه بتتخبّا، ولا بتقدر تخبّي حدا.

خيمِه

الساحه والبركه بيشكرو ألله لأنّو ما في فوق راسُن خَيمِه.

حجر

الحجر ما بيطير، تا يوصل عالبركه من برّات ساحتا.

تعِيشو

السياج تابوت الساحه.

وِحْدِه

ولَو كانت الساحَه وسْع الدني، إزا صارت تنَين بتبطِّل تساع حدا.

سياج

يللي بدّو يسيّج الساحه، يشيل السياج ويتركا تتعبّا ناس.

أكتر

الساحه أكتر من وَسْعَه، والبركه أكتر من علبة مَيّ.

خسارَه كبيرِه

ما خسرو الساحات الزغار، إلاّ لمّا رضيو يصيرو ساحه كبيرِه.

تعتير

شو معتّرين اللي غَيّرو البركه، وقت اللي كان لازم يغيّرو مَيّتا.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s