بين كلاب المزابل

amir-ok 

إيلون هليّل

“ممنونتَك يا الله عَ زْبالة الناس

والناس الزبالي.

ولَيك كْياس النَيلون،

وجوه اللي كَبُّوَا

عليُن عَم بتلالي،

ممنونتَك يا الله…عَ الناس الزبالي”.

هيك كانت عَم تبربر بْ قَلبا مَرا سَوْدا بتشتغل صانعا، عم تبرُم عَ المَزابل وتنقّي:

لاقت سْكَربيني لَ بنتا اللي ناطرا يجيا عَريس بْ سريلانكا،

لاقت أكل عَ جمعا،

وجزدان فاضي لأن اللي كانت تعبّيه من جَيبة جَوزا لاحظِت إنّو زِغر عَ مَصروفا وشْتَرت جزدان أكبر.

لاقت تياب حَسّتُن جداد لأن جسما العَتيق ما نْحَفّ وَلا مَرّا إلاّ عَ القماش الخشن،

هَرَّبت من دَرب الجرادين كِمْ رغيف خبز، وتناتشت مع البْسينات والكلاب أكتر من كيس دِسمين.

لاقت حالا سِتّ قدّام واجهة محلّ وآرمة زبالي مضوّايي بتعزما تعمل شُوبينغ.

لاقت حَياتا مَربوطا عَ زبالة الناس والناس الزبالي، وكَمّلت بْ قَلبا:

“ممنونتَك يا الله عَ زبالة الناس…والناس الزبالي. ممنونتَك عَ اللي لْقيتُن اليوم

عْطيني لاقي متلُن كل يوم

أُوعا الزبالي تنقَص

أو الناس الزبالي ما يضلّو كتار.

إنت اللي قِلت إنّو ما بيسوَا ناخُد خبز الولاد ونزتّو لَ جْراوي الكلاب

وجاوبتَك المَرا الكنعانيّي: بسّ جْراوي الكلاب بياكلو من الفتافيت اللي بيوقَعو عَن مَوايد أسيادُن…ممنونتَك عَ الفتافيت

ممنونتَك عَ مَوايد الزبالي

ممنوتَك عَ الأسياد

ومِش ممنونتَك إنّي بَيّنت كَلبي

بين كلاب المزابل.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s