زكا وغشمَنِه

koz

قزحيا ساسين

بـ محلاّ

الغشمنه بـ محلاّ… زكا.

حلم

الغشمنه حلم من أحلام الأزكيا اللي ما بتتحقّق.

يطَوِّل عمرا

طُول عمر الدجاجِه من غشمنة التعلب، مش من زكاها.

عقل

اشتريو عقل للغشيم، ما لاقولو مطرح بـ راسو الفاضي.

مش بـ مطرحو

الحمار الزكي، بيكسد بـ سوق الحمير.

خلّيك نضيف

قلّو الحمار لَ إبنو: لا تفوت عا إسطبل الإحصنِه، تا ما تتوسّخ “زكا”.

لازم يعرف

الزكي اللي ما بيعرف يكون غشيم، نصّ زكي.

فارَه

الفارَه الزكيِّه بتعلّم بنتا بالبسَين الغشيم.

معلِّم

الغشيم اللي حطّ الساعَه بـ إيد اليمين، علّم الزكي يحطّا بـ إيد الشمال.

طلب إيدا

راح الزكا يطلب إيد الغشمنه، قالتلو: أيّا إيد بدّك؟

حظّو قليل

الزكي راهن عالحصان الغشيم، لأنّو بيعرف الزكا حظّو قليل.

بيوجَع عنّو

الغشمنه ما بتوجّع الغشيم، بتوجّع الزكي اللي حدّو.

زقفِه

الزكي، هُوِّه وعم يزقّفلو عقلو، بيوجَع كأنّو عم يضربو كفّ بالإيدتَين.

صلا

الغشمنِه بتطَوّل مسبحتا، لأنّا ما بتعرف تعمل الخطيِّه.

ما بيشوفا

ياما الزكي ما بيشوف الإشيا، لأنّا بتكون عم تمرق بـ بالو هيِّه وقدّامو.

لمبَه وسقف

لاقا الغشيم لمبَه عالطريق، تديَّن تا عمَّرلا سقف.

شَعر

طلعت دقن الغشيم، افتكر شعر راسو عم يعمل لَ دقنو زيارَه.

اضحكو

الزكي بيضحّكَك بالكلمه اللي بيلاقيا، والغشيم بالكلمه اللي ما بيلاقيا.

شو بيعمل؟

مرّات، الزكي بيحمل الغشيم ع كتافو، تا ما يتفركش فيه.

برنيطَه

عيَّد الغشيم لمّا برنيطة الزكي طلعت ع قياس راسو.

خُلْد

زكا الخلد… بـ دينَيه.

أيّا قبل؟

صار القنّ بـ بطن الغشيم، والزكي مش رح ياكل قبل ما يعرف أيّا قبل: البيضه أو الدجاجِه!

مش كلاّ

مش كلّ الروس منحنيِّه من الزكا.

أرزِه

زكا الأرزِه، خلاّها شجرَه بتعبّي الراس مش البطن.

مات من الضحك

العصفور اللي لقَطو الصيّاد عالدبق، وطَيَّرو تا يتصيّدو بالبارودِه… مات من الضحك.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s