ريحة ومنخار

Koz-1

قزحيا ساسين

شيبِه غاليِه

المنخار الشايب بيمشي عالسجّاد الأحمر بـ سوق العطّارين.

صعبِه

المنخار بيشمّ جنَينة ورد، وما بيصير قنّينة ريحَه.

عَين

المنخار عين، ما بتشوف إلاّ الريحه.

قليل المرُوِّه

شغَّلو قليل المروّه بـ شمّ الورد، صار بدّو حدا معو يحمل عنّو منخارو.

يا حرام

يللي بيشْمر منخارو، بتمرق الريحَه الحلوِه من تحتو.

ما بيشمّ

لولا المنخار بيشمّ ريحتو، ما بيقول عن ريحَه بشعَه.

بالصحن

المنخار اللي مغمَّس بالصحن، لا بيعرف الطعمِه، ولا بيعرف الريحَه.

ناطر

المنخار اللي بينطر الريحه تجي لَ عندو، ما بيشمّ إلاّ ريحتو.

بتنسا

لمّا المنخار بيدلَّك عالريحه الحلوه، بتنسا شو بينزل منّو.

خَيّ

الريحَه الحلوه بتفتح القلب، والمنخار ما معو خبر.

ورد

ما في أكتر من الورد اللي بيرضي العين، وبيزعّل المنخار.

مدروسِه

ألله ما حطّ المنخار عالخصر، تا يرغّبو بالريحه الحلوه.

بشعَه

كلّ المناخير بشعَه، إزا ما شمِّت ريحَه حلوه.

قادوميِّه

المنخار بيشمّ ريحة البصل من دمعة العَين.

كلب

الريحَه رَسَن بيجرّ الكلب بـ مناخيرو.

أطرش

مناخير الأطرش بتشمّ ريحة الطبل المغطَّا.

كبير يا زغير

لا الريحه بـ كبْر الزهرَه، ولا الشمّ بـ كبْر المنخار.

بلاها

ريحة البخّور طالعَه من مناخير الملايكِه.

بالرخْص

سِدّ مناخيرك للريحَه الحلوه، بتشتريا بالرخص.

عشرَه

عشر مناخير شمّو الريحَه زاتا، طلْعِت عشر روايح.

بحّار

منخار البحّار العتيق، بيشمّ ريحة الميّ لَ وحدا، وريحة الملح لَ وحدا.

خنزير

شمّ الخنزير ريحَه حلوه، مات من وجع منخارو.

منْكيِّه

الريحه المنكيّه بتركب عا ضهر المنخار تا ما يقدر يشمّا.

غناج

ما في غير الريحه البشعه بتغنّج المنخار.

لا تزيدا

لا تزيدا عا منخارك وتسألو عن ريحة الغفا لمّا بتوعا من النوم.

شغْلِتا

ألله خلَق الإنسان، وقَلاّ للريحه تنخر المنخار.

في أكتر

الريحه البشعه إلا منخار يشمّا، ويشكر ربّو لأنّا مش بشعه أكتر.

حدّاد

ريحة القطن أتقل من ريحة الحديد عا منخار الحدّاد.

بحر

إزا البحر ضيّع ريحتو، بيلاقيا بـ منخار السفينِه.

دجاجه

منخار الدجاجه ما بيشمّ ريحة التعلب مرّتَين.

ما بيطالا

الريحه اللي ما بيطالا المنخار، بيقول عنا بشعه.

عطّار

منخار العطّار عيَّد لمّا مرق حدّ المزبلِه.

مسك وعنبر

لا تفتكر تمَّك مسك وعنبر، إزا منخارك ما بيشمّ ريحتو.

ملَك

الملك اللي بتطلع منّو ريحه بشعه، بيحشي مناخير حرّاسو بـ ورق الورد.

 

 

 

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s