مربوط وفالت

Koz-1

قزحيا ساسين

عطر

كلّ الورود المربوطّه عطرا بيضلّ فالت.

حُرّ

الحُرّ إزا شاف حبل مربوط… بْيِفِلتو.

شمس

المَيّ اللي مربَّطا الجليد، بتفلت بـ إوّل طلعة شمس.

نصيحَه

يللي ما بدّك ياه يفلت، لا تربطو.

إيدَين ولسانات

يا ما ناس بيربطو لساناتن، تا يفلتو إيديُن.

عصفور

من أوّل رفِّه بيربط العشّ عصفورو بـ خيطان الحنين.

شعر وراس

الشعر المربوط تقيل عالراس الفالت.

وحوش

ما ربّط الوحوش غير الشبع، وما فلَّتا غير الجوع.

حرير سباع

السبع اللي ما بتربّطو بـ خيطان الحرير، بيفكّ الحبل التخين وبينطّ فيه.

جَيبِه

إزا مدّيت إيدك تا تفكّ المربوط بـ جيبتو، بيفتكرك عم بتمدّ إيدك عْلَيا.

حبال

حبال الملح بتربّط البحر هيِّه ودايبِه.

نار

الشمس المربوطَه بـ حبال النار، إزا فلتت منا بتموت.

كلاب

كان الكلب الفالت جوعان، لمّا تطلَّع بالكلب المربوط سدِّت نفسو.

حديد وكلمِه

يللي مربوط بالحديد، بيوجعو قلبو عا يللي مربوط بـ كلمِه.

ما حدا

ما حدا بيقدر يفلّت الناس المربوطين بـ جيابُن.

خوف

يللي ما بيقدر يفلت من حبال الخوف بيربّط القديسين بـ حبال البخّور.

زينِه

يللي بيفلت من الحبال اللي فيه، بيشوف الحبال اللي علَيه زينِه.

نسور

كلّ النسور الفالتِه مربوطَه بـ مناقيرا.

قرد وغزال

قرد فالت ولا غزال مربوط.

عضمِه

أكبر كلب بتربطو بـ عضمه، وبتفلّتو بـ عضمِه.

شبكِه وحبل

ما بيفلّتك من الشبكِه إلاّ اللي بدّو يربطك بالحبل.

عالقصبِه

ما في ضبع فالت قدّ الضبع المربوط عالقصبِه.

ناطور وخيّال

ناطور الإسطبل باس الأرض، لمّا شاف خيّال مربَّط عاخيل فالتِه.

فار

ربَط الفار إبنو بـ شوارب البسَين، وقَلّو ما بتكون إبني إزا ما بتفلت منُن.

هوا

الهوا الفالت ما بيِطْلعلو مع الشَّعر المربوط.

خابيِه

الخابيه اللي بالقبو، مربوطَه بـ كعب العريشِه اللي بالكرْم.

حقّو

ما ضحِك الحبل إلاّ عا يللي انربط فيه مرّتَين.

عاصفِه

المربوط عالعاصفِه بيِلْطا فيا… مش منا.

منبِّه

مش كلّ منبِّه بتربطو، بيفلت جرَسو بالوقت اللي بدّك ياه.

رغيف

الرغيف الفالت أطيب من اللي بتشيلو من الربطَه.

بَرّا

يللي ربط السبع عا باب بيتو، هوِّه ويّاه نامو برّا البيت.

ما بتعرف

يللي بتشوفو فالت، هُوِّه اللي ما بتعرف بـ شو مربوط.

مرا

لمّا ربّطوني عالمرا اللي بحبّا عْرِفت إنّا نصّ الحبل.

شريطَه

الحديد اللي بيحمل البيت، بيربّطوه بـ شريطَه رفيعَه.

قبْل

الحُرّ هُوِّه اللي بيفلت من الحبل، قبْل ما ينربط.

كلّنا

كلّنا مربوطين بالحبال اللي عم نعربش عْلَيا.

 

 

 

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s