كفّ وزقفِه

kozhaya sassine

قزحيا ساسين

saj kad

عجينِه

العجينه اللي ما بتاكل كفوف، ما بتصير رغيف بيتزقَّفلو.

slap

عالرقبِه

كفّ واحد بيزقّف، بَسّ عالرقبِه.

شجاعَه

يا ما الزقفِه بيكون بدّا شجاعه أكتر من ضربة الكفّ.

مرّات

مرّات بتكون البطولِه إنّك تزقّف للخسران، وتضرب الربحان كفّ.

محزون

ضرَب المحزون كفّ بـ كفّ، قالو: عم بيزقّف.

معقول؟

في ناس مستعيرين إيدَيك عا طول، وبْيِزعلو إزا ما زقّفتلُّن.

شوك

يللي كفوفو مدروزين شوك، كيف ما بدّو يبكي هوِّه وعم بيزقّف؟!

نصّ

الكفّ عالقفا نصّ زقفِه.

بالإيدتَين         

clapping-hands copy          

يللي بيزقّف تحت شبّاك المَلَك تا ما يخلّيه ينام، بيكون عم يضرب كفّ بالإيدتَين.

ملَك

المَلَك ما إلو رَوايا، بيتنفّس من كفوف الزقّيفِه.

لا تواخزني

لا تواخزني يا يسوع،  ما قدرت بيّض وجّي مع اللي ضربني كفّ عا خدّي اليمين، لأنّو كان في غيرو عم يضربني عا خدّ الشمال.

تربايِه

ما حدا زقّفلي قدّ اللي لمّا ضربني كفّ وِجِع أكتر منّي.

تحمايِه

لا تصدّق يللي زقّفلك، يمكن يكون عم يحمّي كفّو.

woman-sklaps-man-cartoon__140302192155

بلاها

لمّا بتضرب كفّ وبترجع تزقّف، بتكون زقّفت زقفِه ونصّ.

يلاّ

مش كلّ مرَّه بتلحّق تنفخ بالكفّ قبل ما تضرب.

شماتِه

لمّا زقّفلي عدوّي شماتِه، سامحتو عالكفّ اللي ضربني ياه، بسّ عالزقفِه… لا.

حكّام

الزقفِه أوّل نبيد بيشربوه الحكّام.

مقداف

المَيّ لْ ما بتاكل كفّ من المقداف، ما بتقرّبَك عالشطّ.

عالسكت

الزقفِه اللي ما بتكزب هيِّه اللي ما إلا صوت.

رماديّه

لمّا الكفّ الأبيض بيزقّف مع الكفّ الأسود، بتطلع الزقفِه رماديّه.

daf

دفّ

الدفّ ما بْيِجي إلاّ بالكفّ.

وحْدو

ما حدا بيستاهل الزقفِه إلاّ اللي بيضرب حالو كفّ.

تخبايه

خَبّي كفّك لَ يللي زقّفلك، وطوَّل بالزقفِه.

إزا فيك

المسيحيّه إنّك تزقّف للكفّ اللي ما بينضرَب.

صيّاد

الصيّاد لْ بيقضّيا عم يزقّف لَ كلبو، بيهشّل العصافير.

كفوف

يللي لابس كفوف، لا زقفتو بتنسمع ولا كفّو بيرنّ.

أوّل مرَّه

أوّل مرّه تلاقا الكفّ بـ خيّو وطلعت الزقفِه، صارو الكفَّين يسألو من وين جايه الصوت.

للتهضيم

الكفّ اللي لازم تضربو عالريق، بيصير للتهضيم بعد الترويقَه.

نَوِّيم

الولد اللي بدّك تروّقو كلّ يوم كفّ، لا تسأل ليش بيتأخّر بالنومِه.

تنضيف

يللي عم ينضّف كفوفو من الطحين مش عم يزقّف لَ صاحب الطاحونِه.

ضرَب وكتّر

ما حدا ضرَب وكتَّر، قدّ اللي علاّ إيدو وما ضرب الكفّ.

Parents Stories feature...Child Abuse, Familes, Slapping, spanking, abusing, hitting children, child beating, punishment, violence, agression, hurting. Picture by Roger Bamber: 26 August 2004: Roger Bamber 34 Sillwood Road Brighton BN1 2LE Tel:  01273 730130 Mob: 07860 381255

إمّي

إمّي ما بتضرب. إمّي زقّفِت بـ كفّ واحد عا خدّي.

كَرَم

الكفّ والزقفِه من كَرَم الإيدين، وكلّ شي بيتضيّف بـ وقتو.

ساعَه

الكفّ ساعَه، بسّ تا توَعّي.

من كفّ واحد (لَ عاصي الرحباني)

يا ما الزقفِه بتطلع من كفّ واحد ولَو كانو الكفَّين عم بيزقّفو.

 

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s