مبارح وبُكْرَه

koz

قزحيا ساسين

 

تاريخ

مش شغلة التاريخ يقول شو صار مبارح، قدّ ما شغلتو يقول شو بدّو يصير بكره.

نطْرَه

ناس ناطرين تا يجي البكره. وناس ناطرين تا يجي مبارح.

ما لحَّق

البكره وقت ما لحّق مبارح يجيبو معو.

عزاب

ما حدا بيتعزّب قدّ البكره لْ ما بيقبل يصير مبارح.

نسيان

النسيان… إنّك ما تخلّي مبارح يرجع يجي بكره.

وقت عايش

مش كلّ مبارح وقت ميّت، في مبارح إلو بُكره.

حكيم ونبي

الحكيم بيِتزكّر شو صار مبارح. النبي بيتزكّر شو صار بُكرَه.

مين بيسترجي؟

لازم نقيس العمر بـ كم بكره باقي، مش بـ كم مبارح مرق.

عصا

إجا البكره عم يرقص بالعصا، تا لمّا يصير مبارح يعكّز عْلَيا.

مش هيّن

ما في بكره مش بالل مبارح إيدو فيه.

تياب مرحرحِين

أوّل بكره مرق عالدني، كانو تيابو مرحرحين عليه، لأنّو ما كان هوِّه ومبارح تَحْتُن.

عظيم

العظيم بيتطلّع بـ ساعتو، تا يشوف قدّيش الوقت بُكره.

شَعر

بدَّك تتطلّع مليح، تا تعرف شَعر البكره الأسْود من شعر مبارح المصبوغ.

عربشِه

ما بيقدر البكره يعربش إزا ما كان مبارح عم يهدّيلو السلُّم.

حظّن قليل

ما تعزّبو إلاّ يللي خِلْقو مبارح، وهنِّه ولاد البكره.

رغيف

الرغيف اللي بقي من مبارح مش بايت، الرغيف البايت هوّه اللي بيخبزو البكره عا صاج مبارح.

مرَّه تانيه

التاريخ بيعيد حالو، لمّا بيرعانا البكره ومنحكّ مبارح.

بيتحلاّ

ما في مبارح أحلا من بكره، بسّ الوقت لْ بيموت بيتحلاّ متل الناس اللي بيموتو.

عملاق

قدّ ما يكون البكره قزم، لمّا بيصير مبارح… بيتعملق.

ما بيخلَص

وَلا مبارح بيخلَص لمّا بتغيب الشمس.

ديوك

البكره لْ ما بيجيب ديكو معو، ديك مبارح بيطلّعلو شمس مبارح فيه.

علِّيِّه وقبو

البكره علِّيِّه، ومبارح قبو. والسكْرَه اللي بتتعمَّر فوق، من الخوابي اللي مخبّايين تحت.

تار

كلّنا منحبّ نعيش تا ناخد تار مبارح بالبكره.

قجِّه

كيف ما بدُّن مبارح والبكره ينوجعو، مادام قجّة أحلامُن أكبر من قجّة وقتُن.

 

 

 

Advertisements

One thought on “مبارح وبُكْرَه”

  1. “البكره علِّيِّه، ومبارح قبو. والسكْرَه اللي بتتعمَّر فوق، من الخوابي اللي مخبّايين تحت.” قزحيا ساسين، قلم مجبول بالحكمة.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s