سخرَه وأُجرَه

koz

قزحيا ساسين

عصفور

العصفور اللي بدّك يوعّيك يوميِّه، بدّك تحطّلّو أجرتو بـ منقارو.

مكاري وحمار

يللي دفع أجرة المكاري للحمار، تاني يوم رح يشتقلُن تنَيناتُن.

أغنيا

الفُقَرا بيسخّرو الأغنيا بـ حَمْل مصريّاتُن.

نهر

النهر بيحمل ميّات السواقي سُخْره، تا يصير إسمو نهر.

من جَيبتَك

السخرَه إنّك تعطيني أجرتي من جيبتَك بَسّ.

فايدِه

الفايدِه أجرة النطْرَه.

حسابات

يللي ما بدَّك تشتغل معو بُكْرَه بالسخره، لا تخَلِّيه اليوم يعطيك أكتر من أجرتَك.

فقير

أوّل شي بيحملو الفقير سخره هُوِّه جيابو.

صعبِه

صعبِه تفهِّم حدا إنّك عم تشتغلّو بَلا أُجْره… مش بالسخْرَه.

بلاها

لا تشغِّلني عمر بالسخره، ولا تعطيني أجرة آخر نهار.

بَلا أجره

كلّ الجيوش بيقاتلو بالسخره، لأنّو ما في أجره أغلا من دمُّن.

صخور

ما في أصعب من حمْل الصخور بالسخره، إلاّ الكتيبِه بالأجره.

كلاب

كلّ الكلاب بتنطر تلّة عضام… بَلا أجره.

حاميِه

الغني: “أنا عطيتَك أقلّ من أجرتَك”.

الفقير: “أنا سخَّرتَك بـ عَدّ أجرتي”.

جوانح

العصفور اللي خِلِق بـ جانح واحد شَكَر ربّو. العصفور اللي خِلِق بـِ تلات جوانح قَلّو لَ ألله:”ليش حِمَّلتني هالجوانح سُخرَه؟”

عبيد

أجرة العبيد إنُّن يحملو كلّ يوم تابوت مَلَك… بالسخره.

أطرش

الأطرش بيزيّن دَينتو كلّ يوم بـ حَلقَه، تا ما يحسّ حالو حامِلا سخره.

ورد وشوك

يللي سخَّرَك بـ حَمْل الشوك، مش رح يعطيك أجرتك بـ حَمْل الورد.

محبِّه

لمّا بتحمل جيابك الفاضيِه سخره، بتعرف قدّيش كان في ناس عم يحبّوك بالأجره.

قرش أسْوَد

يللي أجرتو قرش أسْود لَ أيّا يوم بدّو يخبّيه؟!

مُرّ

ما في أمَرّ من السكَّر لمّا بيحمّلوك ياه بالسخره.

حرير

السخره بـ حمِل الحرير بتوجّع أكتر من السخره بـ حَمل الحجار.

رسّام

الرسّام اللي ما بياخد أجرتو، ما بتنجح معو لوحة الناس اللي عم يشتغلو بالسخره.

جياب الخوابي

أجرة ناطور الزيتون بـ جياب الخوابي.

من زمان

قبل ما يخترع الإنسان العُمْلِه، كانو كلّ الناس ياخدو الأجره زاتا.

تقال

يللي راحو يشتغلو بالسخره، جياب تيابُن أتقل من الحجار اللي عَ كتافُن.

لحّام

ياما ناس بيشتغلو عند اللحّام، وبيوَدّيلُن أجرتُن لحم… مع كلبو.

مال

المال شغَّل الأغنيا عندو بالسخره.

خيّاط

يللي بيشتغل عند الخيّاط أجرتو دبابيس.

شغْل

لمّا بيقولولَك:”نام وخود أجرتَك”، بتوعا الصبح عرقان.

عم بتشتّي

يللي نَقّا القطن تا يحملو بالسخره نسي إنّو بـ كانون بتشتّي الدني.

ما بتزبط

لَو كلّ إنسان أجرتو من الشّي اللي عم يشتغل فيه، ما كان حدا اشتغل بالوَسَخ.

K-S

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s