جرن ومْدقَّه

Koz

قزحيا ساسين

ساعة الأحد

المدقّه والجرن أقدم ساعَه بـ ضيعتنا، بسّ ما كانت تدقّ إلاّ يوم الأحد.

عالي

يللي ما سِمِع المدقّه والجرن، ما عِرِف قدّيش الشجرَه والصخرَه صَوتُن عالي بـ ضيعتنا.

لا تحلم

مابيندقّ بـمدقّتَين، قدّ ما كان الجرن واسع.

نيّالو

نيّال الخروف، لأنّو ما بيعرف إنّو السنديانِه اللي عم يرعا وَرَقا بْيِطْلَع منا مدقَّه، والصخرَه اللي عم ينام بـ فَيِّتا قاعد فيا الجرن.

بخيل

الراعي البخيل بيسمَع الجرن والمدقَّه عم يِعْوُو متل الديب.

مكسورَه

المدقَّه بالجرن المكسور مكسورَه أكتر منّو.

صحتَين

كمان المدقَّه والجرن بياكلو، بسّ من بَعْضُن.

وِحْدِه بـ وحْدِه

إزا ما رفَع العريس الجرن، العروس ما بترفع المدقَّه.

وَفي

لمّا صارت السنديانه مدقّه والصخرَه جرن، بقي الخروف بيناتُن.

مربّايِه

المدقَّه اللي جايِه من شجرَه مْرِبّايِه ما بتدقّ بـ جرْنَين.

عيد المدقّه

طَبّو جرن عا جرن، وبَيناتُن المدقّه، صار كلّ جرن يقول: هيدِه لَ إلي.

توسيع

صدر الجرن بتوسّعو المدقَّه.

انجَرَح

ما انجرح إلاّ الجرن اللي ما اندقّ فِيه.

مفَسّخَه

المدقّه المفسّخَه بتاكل أكتر من أهل البيت.

قلب الجرن

المدقّه بتدقّ بـ قلب الجرن، وما في قلب بيعدّ دقّاتو.

ما وصْلِت

الجرن وَجَّعِتو المدقَّه اللي ما وصْلت علَيه.

زند

عَيب المدقّه من الزند اللي عم بيدقّ فيا.

طولة بال

الجرن والمدقّه اللي بيطَوّلو بالُن، بيوصَل لَ عندُن عشب الحقلِه لحم.

سِتّي

بيـ عيلة جدّي، تلاتِه بينامو جوعانين: المدقّه والجرن… وستّي.

غالي وأغلا

فيك ترَبّي شجرَه تا ينشال منا مدقّه، بسّ ما فيك تربّي صخرَه تا ينشال منا جرن.

خشب

يا ما المدقّه اللي من خشب مقطَّشِه اجران من حجر.

مش علَيه

المدقّه تا يطْلعلا صوت ، بتمدّ لسانا بـ جرْنا… مش علَيه.

وجَع

المدقّه اللي بتوقَع من الجرن بتُوجَع، مش اللي بتُوقَع فِيه.

عالي

الجرن العالي، لا بيصِير عامود تا يسند السقف، ولا بيتهَنّا بـ مدقّه.

كانون وآب

يللي بيوقِد المدقّه بـ كانون، بيدنِّق عا صحن الكبِّه بـ آب.

إزميل الخشب

المدقّه بتنعّم صدر الجرن، بسّ إزميل الخشب ما بيقدر ينحتو.

مدْح

اللي بدّو يمدح الجرن، ما بيقول عنّو:”طالعَه الكبِّه من مناخيرو”.

قيامِه

بـ عيد الكبير، بيقوم المسيح من الموت عا صوت المدقّه والجرن بـ ضْياعنا.

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s