فرّاط وقطّاف

Koz

قزحيا ساسين

شجرَه

الشجره اللي بتزعل من الفرّاط والقطّاف، ما بيبقا إلا إلاّ الحطّاب.

وردِه

الورده اللي ما بتقطف عَيني، ما بتقطفا إيدي.

جَوز

بـ شجرة الجوز اللي معوَّدِه عالفراط، بتهرب الجوزِه من إيدك إنته وعم تقطفا.

شُعَرا

كلّ الي عِمْلو المُتنبّي، إنّو شاف الشُعَرا عم يفرطو شجرة اللغَّه، وهُوِّه… قَطَف.

آدم

بعد ما قطف آدم التفّاحَه فَرَط صابيعو.

معوَّد

يللي معوَّد ع فراط الزيتون، بياخد معو الفاروطَه ع قطاف التفّاح.

حملان

لَوما الزيتون بيحمل كتير، كان انقطف ما انفرط.

ما بيقطف

دقِّت الجوزِه بـ كتف الفرّاط، بيْعَد عنا تا يفرطا.

وقت وناس

في ناس متل الوقت، بتفتكر إنّك عم تقطفُن هنِّه وعم يقطفوك!

زَيت

لَو ما الزيتون انوجع بالفراط، ما كان الزيت بيضَوّي.

فاروطَه

الفاروطَه اللي عم تلْمَع  بـ كرْم الزيتون، ما بـ عُمْرا بترشح زيت.

بتِكْبَرْلا

الجوزه اللي بتقطفا وبتخلِّصا من الشبّيط، بتبطّل تنكسر معك عالهِينِه.

دجاجِه

يللي فَرَط الدجاجِه بالشبّيط، رح يلمّ كمشة ريش مش كمشة بَيض.

عمْيِتْ

فَرَطو العميان شجرة عيون، ما وصْلِت عالأرض عَين صاغ… وزادو واحد.

غريب

القطّاف اللي عندو ولَد مسافِر، تَرَك تَمْرَه بالشجرَه للطَّير الغريب.

افرطو

فِي شجر ما بْيِحْمِل إلاّ بالفراط.

تلْج

يللي ما بدّو يفرط جَوزتو، التلج بيقطفا معو.

انتِبِه

يللي ما بتقطفو… بيفرطَك.

شجرَه بالإيد

الساعَه بـ إيدِي شجرة وقت: عقرب السواني بيفرط، وعقرب الدقايق بيقطف، وعقرب الساعات بينطر التَّمْرَه تُوقَع عا راسو.

يا حنون

التمرَه اللي خيَّرتا بين القطاف والفراط، مش رح تعْمِلَّك تمسال.

سايبِه

جوزة الطريق بيتعلّمو فيا الفراط.

بَيِّي وأنا

فَرَطْت الشجره اللي زَرَعا بيّي، وقَطَفت اللي زَرَعْتا أنا.

من قلبَك

افرُطْني من قلبَك ولا تقطفني من قفا إيدَك.

يا هَيك… يا هَيك

ما حدا بيتعزّب قدّ الشجره اللي بينفرط نِصّا وبينقطف نصّا التاني.

ما في عدْل

لَو في عدْل، مانقطف السفرجل وانفرط الجوز.

وَين؟

إزا خَبّا فرّاط الجوز شَبِّيطو، وين بيخَبّي صابيعو السُّود؟

مش منّو

لا تشتري من الفرّاط، لأنّو ما بيعرف يعدّ للعشرَه.

صلا

ساعِدني يا ربّ، لمّا ما بقْدر طال، تا أقطف بـ عيوني، وما أُفرُط بـ إيدَيِّي.

“إيلي”

يبْني وْ إِنِتْ بـ مراية النطرَه

رْسَمتَك أنا وإمَّك بـ كحْل العينتَين

وغَيرَك ما شفْنا بـ هالدّني تَمْرَه

بالوقت زاتو بتنقَطَف من شجرتَين

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s